Hart sótt að Ólafi F í borgarstjórn

„Borgarráð er ekki ruslakista fyrir andlegt rusl úr þér," segir Ólafur F Magnússon að Óskar Bergsson formaður borgarráðs hafi sagt um sig á fundi borgarráðs í dag.

Ólafur segir ennfremur að ýmsir borgarfulltrúar Sjálfstæðisflokksins hafi gengið langt í aðdróttunum sínum gagnvart sér, þar sem seilst er langt út fyrir velsæmismörk á fundi borgarstjórnar fyrr í vikunni.

Þetta segir hann í tilkynningu sem hann sendir fjölmiðlum nú seinni partinn. Hann segist vorkenna þessum borgarfulltrúum þar sem þeir eigi fá eða engin svör við gagnrýni sinni á sérhagsmunagæslu þeirra og forgangsröðun í þágu skammvinns ávinnings fárra fremur en langtímahagsmuna almennings.

„Þegar fátt er um svör er gripið til þess ráðs að reyna að útmála andstæðinginn sem óstarfhæfan einstakling, sem skorti bæði andlegt atgervi og heilbrigði til að fást við borgarmálin. Þetta er víðs fjarri öllum sannleika og harkalegt fyrir undirritaðan, sem á að baki náms- og starfsferil, sem sannar hið gagnstæða, en erfitt er að fást við kerfisbundnar rangfærslur borgarfulltrúa Sjálfstæðisflokks og bakhjarla þeirra á fjölmiðlum og meðal auðmanna," segir Ólafur.

Hann segir þó að enginn komist með tærnar þar sem borgarfulltrúi Framsóknarflokksins, Óskar Bergsson, hafi hælana í rætnum og lágkúrulegum ummælum á vettvangi borgarstjórnar og borgarráðs. Á fundi borgarstjórnar í fyrradag hafi hann enn einu sinni slegið öll fyrri met í þeim efnum.

Í kjölfar þess lagði Ólafur F fram svohljóðandi bókun í borgarráði í dag:

„Ég mótmæli harðlega framkomu og ummælum Óskars Bergssonar, formanns borgarráðs, í minn garð á síðasta borgarstjórnarfundi, þar sem hann enn einu sinni slær öll fyrri met í lágkúru á vettvangi borgarstjórnar og borgarráðs. Dylgjur hans um persónu mína og einkalíf eru byggðar á gróusögum, sem þáverandi tilvonandi borgarstjóri, Hanna Birna Kristjánsdóttir, bar á borð fyrir mig á fundi með mér í Ráðhúsinu 13. ágúst sl. Þar krafðist hún þess að ég segði af mér sem borgarstjóri, vegna þessara gróusagna, sem eru með öllu ósannar. Hún taldi það ekki skipta neinu máli. Nóg væri að ásakanirnar kæmu fram! Ég vísa þessum dylgjum enn einu sinni á bug um leið og ég lýsi vantrausti mínu og vanþóknum á því að Óskar Bergsson gegni formennsku í borgarráði Reykjavíkur."

Ólafur segir að Óskar hafi neitað að taka bókunina á dagskrá með þeim ummælum að borgarráð væri ekki ruslakista fyrir andlegt rusl úr Ólafi.

„Líklega hafa önnur eins ummæli aldrei verið viðhöfð í sögu borgarráðs og eru langt út fyrir það sem ég hef kynnst á löngum ferli í borgarstjórn og borgarráði, jafnvel af hálfu Óskars Bergssonar, sem setur hvert metið á fætur öðru þessa dagana," segir Ólafur að lokum.