Torres: Carvalho besti varnarmaðurinn

Fernando Torres, sóknarmaður Liverpool, segir að Ricardo Carvalho hjá Chelsea sé besti varnarmaður úrvalsdeildarinnar að sínu mati. Torres átti frábært fyrsta tímabil í deildinni en segir að starf hans hafi verið gert auðveldara með lélegum varnarleik.

Torres segir að Carvalho sé betri en John Terry. „Terry er fyrirliðinn og fær meiri umfjöllun. Ricky er hinsvegar betri, hann hefur allt það sem til þarf. Hefðbundinn varnarmaður í deildinni er ákafur, stór og sterkur. Þeir halda að þeir geti stöðvað mig með því að hafa meiri líkamsstyrk," sagði Torres.

„Sannleikurinn er sá að þeir eru oft illa staðsettir og of ákafir. Það er eitthvað sem ég hef nýtt mér og oft náð að fá mikið pláss. Þetta á ekki við um Carvalho."