Vieira æfði í gær

Patrick Vieira, fyrirliði Frakklands, æfði í gær og er því útlit fyrir að hann geti verið með á Evrópumótinu. Thierry Henry og Franck Ribery þurftu að hætta á æfingunni vegna smávægilegra meiðsla sem ættu ekki að hafa áhrif á þátttöku þeirra á EM.

Vieira hafði ekki æft síðan hann meiddist á föstudag. Hann tók þátt í allri æfingunni í gær, hljóp af krafti og lék sér með bolta líkt og liðsfélagar hans.

Það er þó mjög líklegt að hann missi af fyrsta leik Frakklands sem verður gegn Rúmeníu 9. júní.

Mathieu Flamini hefur æft með franska liðinu og á að kalla hann í liðið ef Vieira getur ekki verið með á mótinu. Nú er útlit fyrir að þess þurfi ekki og Flamini muni því halda heim á leið. Búast má við endanlegri ákvörðun á sunnudag.

Frakkland er í svokölluðum dauðariðli Evrópumótsins, auk Rúmeníu er Holland og Ítalía í riðlinum.