Halldór vill að Ísland leiti til Alþjóðagjaldeyrissjóðsins

Nauðsynlegt er að Ísland leiti eftir efnahagsaðstoð hjá Alþjóðagjaldeyrissjóðnum, að mati Halldórs Ásgrímssonar fyrrverandi forsætisráðherra.

,,Ég er þeirra skoðunar að það sé nauðsynlegt leita til Alþjóðagjaldeyrissjóðsins. Ísland þarf á aðstoð að halda. Það er búið að loka fyrir meira og minna öll lánsviðskipti. Auðvitað er það þannig að hann mun setja einhver skilyrði en ég á ekki von á því að þau skilyrði verði með þeim hætti að þau verði óviðráðanleg. Það er bara þannig að þegar maður er í neyð þá þurfa menn á aðstoð að halda og það verður að viðurkenna," segir Halldór.

Halldór kveðst einnig vera þeirra skoðunar að flýta verði fjárfestingum sem hafa verið í undirbúningi vegna orkuframleiðslu og iðnaðar. ,,Það verða margir atvinnulausir og það þarf að koma einhverjum nýjum hjólum í gang." Halldór telur einnig mikilvægt að fá erlendan banka til að hefja starfsemi hér á landi. Óheppilegt hafi verið að einungis innlendir bankar hafi starfað hér undanfarin ár.

Halldór er framkvæmdastjóri Norrænu ráðherranefndarinnar með aðsetur í Danmörku. Hann segir að umræðan um fjármálakreppuna á Íslandi þar og í Svíþjóð vera afar alvarlega.

,,Auðvitað eru allir að berjast við fjármálakreppuna. Það er ljóst að hún hefur komið sérstaklega illa við Ísland og um það er mikið fjallað. Það er sagt á ýmsum stöðum að Ísland sé að verða gjaldþrota. Það er auðvitað langt því frá því að slík staða sé á Íslandi vegna þess að við eigum miklar auðlindir og eigum mörg tækifæri," segir Halldór og líkir ástandinu við skip í sjávarháska sem þarf á aðstoð að halda. ,,Það er miður að ráðist sé á þetta skip meðal annars frá Bretlandi. Svona gera ráðherrar ekki og það er mjög alvarlegt."

Halldór telur mikilvægt að við þessar aðstæður sé stefnan sett inn í framtíðina. ,,Ég hef lengi verið þeirra skoðunar að það verði mjög erfitt að berjast með íslensku krónuna í þessu alþjóðlega umróti og talaði fyrir því að menn skoðuðu aðild að Evrópusambandinu."

Hallór segir að aðildarviðræður bjargi ekki miklu í dag. ,,En menn verða að viðurkenna að komið er upp slíkt vantraust á íslensku krónuna bæði inn á við og út á við að leita verður nýrra leiða. Ég er ekki lengur í neinum vafa um það að aðild að Evrópusambandinu og aðild að Evrópska myntbandalaginu er hlutur sem að menn verða að líta miklu alvarlegar á en nokkru sinni fyrr," segir Halldór.

Aðspurður hvort rétt hafi verið að einkavæða bankanna segir Halldór að hann sé þeirra skoðunar. Rangt hafi verið að ríkið færi með meirihluta í rekstri bankastofnanna landsins.

,,Ég er ekki í neinum vafa um það. Meinið liggur ekki þar. Auðvitað liggur aðalmeinið í þessari fjármálakreppu sem nú gengur yfir heiminn."

Halldór bendir á að íslenska hagkerfið sé mjög lítið. ,,Það er til dæmis ekki nema eitt prósent af hagkerfi Norðurlandanna þegar við leggjum öll Norðurlöndin saman. Meinið liggur frekar í því hvað Íslendingar eru fáir og íslenska hagkerfið er lítið." Að ætla sér að vinna með slíkt hagkerfi á alþjóðlegum mörkuðum fyrir opnu hafi eins og umhverfið er hefur alltaf verið vitað að yrði erfitt.

,,Þess vegna hef ég verið þeirrar skoðunar að menn þyrftu að taka nýja stefnu á ný mið inn í framtíðina," segir Halldór og vísar í orð sín um aðild að Evrópusambandinu.