Samfylkingin er múlbundin Sjálfstæðisflokknum

Magnús Stefánsson, þingmaður Framsóknarflokksins og fyrrverandi ráðherra, segir að Samfylkingin sé múlbundin Sjálfstæðisflokknum. Hann segir í nýlegum pistli á heimasíðu sinni merkilegt að Samfylkingin hafi staðið að frumvarpi til laga um sjúkratryggingar sem varð að lögum í dag. Þingmenn Framsóknarflokksins sátu hjá við afgreiðslu málsins.

Magnús segir að Samfylkingin slái um sig með því að vera flokkur jafnaðarmanna en gegnum tíðina hafi málflutningur jafnaðarmanna verið í allt aðra átt en það sem felst í nýsamþykktu frumvarpi um sjúkratryggingar.

,,Nú hefur Sjálfstæðisflokkurinn múlbundið Samfylkinguna með atbeina formanns Samfylkingarinnar og þingmenn hennar ganga í takt á eftir sjálfstæðismönnum á einkavæðingargöngunni, í einni halarófu eins og leikskólakrakkar í göngutúr," segir Magnús.