Bragarbót í próflokafagnaði grunnskólanema

Það er ekki síst foreldrum að þakka hve mikið hefur dregið úr hrunadansi grunnskólanemenda að loknum samræmdum prófum en þeim lýkur einmitt í dag. Þetta segir Marta Kristín Hreiðarsdóttir, félagsfræðingur í forvörnum hjá lögreglunni á höfuðborgarsvæðinu.

Ekki eru mörg ár síðan fréttir af drykkjulátum 10. bekkinga, nýsloppinna frá prófborðinu, settu svip sinn á maímánuð. Algengt var t.a.m. að unglingarnir söfnuðust saman í og við Kringluna og voru þar sumir lítt við alþýðuskap.

„Þetta hefur batnað mikið. Við höfum verið með vaktir, lögreglan, félagsþjónustan og ÍTR við lok samræmdu prófanna. Þar hefur verið kíkt eftir krökkunum. Nú hefur verið unnið markvisst að því að skólar og félagsmiðstöðvar bjóði upp á ferðir fyrir krakkana. Sumir fara í dagsferðir, aðrir gista yfir nótt og það er allur gangur á þessu. Þetta þýðir meiri dreifingu í skemmtanalífinu, það eru ekki allir á sama tíma að skemmta sér og taka út próflokin," sagði Marta.

Hún sagði þetta framtak hafa skilað miklum árangri og væri það ekki síst foreldrum að þakka en þeir hefðu verið hvattir til að styðja við börn sín, beina þeim í átt að uppbyggilegum skemmtunum og síðast en ekki síst kaupa alls ekki áfengi handa þeim.

Fjöldi grunnskóla á höfuðborgarsvæðinu stendur fyrir slíkum próflokaferðum í dag.