Haraldur Freyr ósáttur hjá Álasundi

Haraldur Freyr Guðmundsson segir í viðtali við Aftenposten í dag að hann hafi verið mjög ósáttur við að hann missti sæti sitt í byrjunarliði Álasunds.

Harladur hefur undanfarin ár verið fastamaður í liði Álasunds og oftar en ekki gegnt stöðu fyrirliða. Hann var áfram fastamaður í vörn liðsins á undirbúningstímabilinu og var í byrjunarliðinu er liðið tapaði 1-0 í fyrstu umferð fyrir Vålerenga.

Síðan þá hefur hann mátt sitja á bekknum en liðið hefur leikið tvo leiki síðan þá, unnið einn og tapað einum.

Hann sagðist ekki vera ánægður með að sitja á bekknum. „Ég er í Álasundi til að spila fótbolta með aðalliði félagsins. Þetta kom mér mjög á óvart. Benjamin Kibebe og Amund Skiri hafa spilað vel í þessum tveimur leikjum og á ég því ekki von á að ég fái tækifærið aftur fljótlega."

„Þjálfarinn skiptir sjaldan um leikmenn í vörn nema eitthvað sérstakt komi upp á. Ég býst við því að bíða lengi eftir að fá tækifærið á nýjan leik."

„Ég hef spurt sjálfan mig af því hvort ég átti skilið að missa sætið í byrjunarliðinu og vil ég meina að ég hafi ekki átt það skilið," sagði Haraldur.

Spurður hvort hann geti komið sér aftur í byrjunarliðið með því að standa sig vel með varaliði Álasunds í þriðju deildinni segir að hann búist ekki við því.

„Ég á mjög erfitt með að koma mér almennilega í gírinn fyrir varaliðsleiki. Það eru meiri líkur á því að ég fái tækifærið aftur ef annað hvort Amund eða Benjamin spili sig úr liðinu sjálfir."

Áttu von á því að þú færir þig um set í sumar ef þetta breytist ekki?

„Ég hef ekki hugsað svo langt. En ég og fjölskyldan mín munum fara frá Álasundi fyrr eða síðar, það er fullvíst. Hvort það verði eftir nokkra mánuði eða eftir nokkur ár fer af stærstum hluta eftir fótboltaferli mínum."