Deilt um hvort Samfylkingin væri hlynnt skólagjöldum

Þingmenn Samfylkingarinnar voru krafðir um svör við því hvort þeir vildu skólagjöld hjá opinberum háskólum við upphaf þingfundar í dag. Þingmaður Samfylkingarinnar sagðist furða sig á og vera ósátt við túlkun formanns menntamálanefndar á stefnu flokksins í málinu.

Björn Valur Gíslason, varaþingmaður Vinstri - grænna, vakti máls á því að Sigurður Kári Kristjánsson, þingmaður Sjálfstæðisflokksins og formaður menntamálanefndar, hefði sagt í blaðaviðtali að aðeins væri tímaspursmál hvenær opinberum háskólum yrði heimilað að taka upp skólagjöld. Sagði hann þá skoðun eiga vaxandi fylgi að fagna í samstarfsflokknum Samfylkingunni.

Björn Valur innti Einar Má Sigurðarson, varaformann menntamálanefnar og þingmann Samfylkingarinnar, hver afstaða flokksins væri í málinu og hvort til umræðu væri að taka upp skólagjöld í opinberum háskólum.

Einar Már Sigurðarson benti á að umræður yrðu um frumvarp um opinbera háskóla á morgun og þar væri engin tillaga um heimild til upptöku skólagjalda. Sagði hann það rétt að það væri verkefni stjórnvalda að tryggja jafnstöðu háskólanna en lykilatriði væri jafnstaða skólanna og að jafnrétti til náms væri tryggt. Sagði hann Íslendinga taka skólagjöld nokkuð óskipulega í sínum háskólum og ræða þyrfti málið. Grundvallaratriðið væri að jafnrétti til náms væri tryggt. Menn ættu að nálgast málið fordómalaust.

Umræða um skólagjöld verði fordómalaus

Sigurður Kári Kristjánsson sagði í umræðunum hafa verið óhræddur við að segja það að hann vildi ekki banna opinberum háskólum að taka upp skólagjöld. Sagðist hann ekki sjá betur en að þau sjónarmið nytu aukins stuðnings í samfélaginu nema kannski hjá Vinstri - grænum.

Þá minnti hann á að núverandi rektor Háskóla Íslands hefði lýst þeim áformum að komast í hóp hundrað bestu háskóla heims. Sagði Sigurður Kári að til þess að það næðist þyrfi skólinn að að sitja við sama borð og keppinautarnir og benti á að langflestir skólarnir á lista hinna hundrað bestu innheimtu skólagjöld. Menn þyrftu að nálgast umræðuina um skólagjöld fordómalust með hagsmuni nemenda og háskólanna í huga.

Birkir Jón Jónsson, þingmaður Framsóknarflokksins, sagði nauðsynlegt að fá úr því skorið hver stefna Samfylkingarinnar í málinu væri. Sagði hann það njóta sívaxandi stuðnings innan Sjálfstæðisflokksins og víðar að taka upp skólagjöld við opinbera háskóla. Framsóknarflokkurinn hefði í samstarfi sínu við Sjálfstæðisflokkinn staðið á bremsunni í þessum málum og það væru því mikil vonbrigði að Einar Már Sigurðarson skyldi ekki geta sagt að það kæmi ekki til greina að taka upp skólagjöld. Það væri áhyggjuefni að Samfylkingin vildi ekki útiloka skólagjöld.

Hissa á túlkun formanns menntamálanefndar

Katrín Júlíusdóttir, þingmaður Samfylkingarinnar, sagðist hissa á því að Sigurður Kári Kristjánsson, skyldi taka að sér að túlka stefnu og líðan Samfylkingarinnar og hún hefði verið ósátt við það. Benti Katrín á að á landsfundi Samfylkingarinnar  í fyrra hefði verið samþykkt að flokkurinn vildi stuðla að því að öllum stæði til boða gjaldfrjáls menntun frá leikskóla til háskóla. Tryggja yrði að skólagjöld yrðu ekki tekin upp í opinberum skólum. Stefna Samfylkingarinnar væri því mjög skýr.

Kolbrún Halldórsdóttir, þingmaður Vinstri - grænna, sagði að það yrði að vera ljóst að ójafnræði háskólanna væri tilkomið vegna stefnu sjálfstæðismanna í málefnum háskóla. Einkaskólarnir fengju að taka skólagjöld ofan á full framlög frá ríkinu. Hún vildi sjá Samfylkinguna standa vörð um þá stefnu Vinstri - grænna að skerða ætti framlag til einkaskóla sem næmi skólagjöldum sem þeir innheimtu.