Tekur Nevio Scala við Parma?

Nevio Scala er talinn líklegastur til að taka við stjórn ítalska liðsins Parma. Félagið rak þjálfarann Domenico Di Carlo í morgun en Parma tapaði fyrir Sampdoria í gær og er í fjórða neðsta sæti.

Di Carlo er níundi þjálfarinn í A-deildinni á Ítalíu sem tekur pokann sinn á þessu tímabili.

Scala er mjög vinsæll meðal stuðningsmanna Parma enda þjálfaði hann liðið með góðum árangri 1990-1996. Scala var meðal áhorfenda á leiknum í gær en hann hefur einnig þjálfað Reggina, Borussia Dortmund, Besiktas, Shaktar Donetsk og Spartak Moskvu.

Einnig er talið að stjórn Parma sé að hugsa út í að ráða hinn sigursæla Alberto Zaccheroni.