Róbert: Ætla að gleyma leiknum og njóta silfursins

„Það er dásamleg tilfinning að vera með silfrið um hálsinn og nú munu allar stíflur bresta hjá manni. Ég er eðlilega mjög stoltur af þessum árangri en samt svekktur að hafa ekki náð gullinu," sagði línumaðurinn Róbert Gunnarsson sem gerir sér þó vel grein fyrir því hvað það þýðir að hafa unnið til silfurverðlauna á Ólympíuleikunum.

„Það er að sjálfsögðu stórkostlegt. Það er heiður að vera í þessu liði og gaman að maður sé hluti af því að gleðja fólk heima á Klakanum. Ég ætla annars að gleyma þessum leik og njóta þess að vera með silfrið."