Íslenska handboltalandsliðið tók áðan við silfurverðlaunum sínum á Ólympíuleikunum í Peking. Söguleg stund fyrir íslenskt íþróttalíf.

Íslendingar fögnuðu silfrinu vel og innilega en voru vitanlega enn svekktir eftir að hafa tapað úrslitaleiknum fyrir Frökkum í dag, 28-23.

Erlendir miðlar sem hafa sagt frá leiknum hrósa íslenska liðinu í hástert fyrir frábæra frammistöðu á mótinu en segja jafnframt um leið sigur franska liðsins sanngjarnan. Þeir séu einfaldlega með besta lið heims í dag.