Gunnar Már: Davíð átti ekki að fá rautt

Gunnar Már Guðmundsson, leikmaður Fjölnis, segir að það hafi verið rangur dómur að gefa FH-ingnum Davíð Þór Viðarssyni rautt spjald í leik liðanna í gær.

Þóroddur Hjaltalín, dómari leiksins, gaf Davíð rauða spjaldið um miðjan fyrri hálfleik í gær en það kom flestum að óvörum. Ekki síst Gunnar Má sjálfum en Þóroddur taldi að Davíð hefði brotið svo illa á honum.

„Hann togaði í mig og ég datt," sagði Gunnar Már í samtali við Vísi. „Ég reyndar lét mig ekki detta. Hann kippti bara óvænt í mig. En Þóroddur var að horfa í hina áttina enda stóð ég fyrir aftan hann. Hann hefur því ályktað eitthvað annað."

Í fyrstu var talið að Davíð hafi gefið Gunnari olnbogaskot en sá síðarnefndi segir að það sé ekki rétt.

„Við lentum í samstuði fyrr í leiknum og ég bara veit ekki af hverju hann togaði mig niður. Hann sagði nú reyndar sjálfur að það hafi ekki verið sérstaklega gáfulegt. En ég stóð svo strax upp aftur og brá þegar dómarinn flaggaði rauða spjaldinu."

Alls fengu sjö leikmenn í sjöttu umferð deildarinnar að líta rauða spjaldið í leikjunum sex.