Kristján ætlar að berjast fyrir sínu hjá Val

Kristján Hauksson er byrjaður að æfa aftur með Val en hann var lánaður til Fjölnis fyrir nýliðið tímabil í Landsbankadeild karla.

Kristján sagðist ekki ætla að fara fram á að vera lánaður aftur til Fjölnis eða annars liðs. „Það var alltaf stefnan að koma aftur í Val og koma mér betur inn í málin hér. Það verður hörkubarátta um sæti í byrjunarliðinu en samkeppni er af hinu góða. Maður verður á tánum allan tímann og ég ætla að standa mig."

Reynir Leósson gekk nýverið til liðs við Val en ljóst er að Barry Smith mun ekki leika með Valsmönnum á næsta ári. Fyrir hjá Val eru miðverðirnir Atli Sveinn Þórarinsson, Gunnar Einarsson og Einar Marteinsson.

Fjölnir varð í sjötta sæti Landsbankadeildarinnar á sínu fyrsta tímabili í efstu deild og komst í úrslit bikarkeppninnar annað árið í röð. Kristján segir að sér hafi liðið vel hjá Fjölni. „Þetta var virkilega skemmtilegt sumar. Það var mjög gaman að spila með þessum strákum og ég efast um að það sé betri mórall í öðru liði en Fjölni."