KR, Breiðablik, Fylkir og Fjölnir í undanúrslit

KR, Breiðablik, Fylkir og Fjölnir tryggðu sér í kvöld sæti í undanúrslitum í Visa-bikar karla í knattspyrnu.

KR-ingar lögðu Grindvíkinga 3-2 í hörkuleik á KR-velli þar sem KR-ingar náðu 2-0 forystu með mörkum Björgólfs Takefusa (4. víti) og Gunnars Jónssonar (11.), en gestirnir jöfnuðu með mörkum frá Mgbang Ondo (42) og Marinko Skaricic (53). Óskra Örn Hauksson skoraði svo það sem reyndist sigurmark KR-inga á 55. mínútu, en eftir það misnotaði Scott Ramsay vítaspyrnu fyrir Grindavík og skömmu síðar átti Ray Anthony Jónsson skot í slá hjá KR-ingum.

Breiðablik sló Keflavík úr keppni með 3-2 sigri á heimavelli. Jóhann Berg Guðmundsson skoraði tvívegis fyrir Blika og Magnús Páll Gunnarsson eitt, en þeir Guðmundur Steinarsson og Guðjón Antoníusson skoruðu mörk Keflavíkur.

Fjölnismenn lögðu Víkinga 1-0 með marki Tómasar Leifssonar í fyrri hálfleik.

Þá unnu Fylkismenn baráttusigur á Haukum á Ásvöllum 1-0 þar sem grípa þurfti til framlengingar eftir að staðan var jöfn 0-0 eftir 90 mínútur. Það var Kjartan Breiðdal sem skoraði sigurmark Árbæinga um miðbik framlengingarinnar.