Roma er erfiður andstæðingur

Fabio Capello, landsliðsþjálfari Englendinga, segir að Roma verði sýnd veiði en ekki gefin gegn Manchester United í Meistaradeildinni. Hann segir að það henti fyrrum lærisveinum sínum ágætlega að mæta United.

"Ég held að það hafi hentað Roma best að mæta United af öllum ensku liðunum því gegn þeim fær liðið að spila sinn leik," sagði Capello og á ekki von á að við fáum að sjá annað 7-1 tap hjá Roma eins og í fyrra.

"Þessi skellur sem Roma fékk í fyrra þroskaði liðið og sýndi mönnum fram á að þeir verði að hafa fullkomna einbeitingu í svon aleikjum. Ég er viss um að við munum sjá betra Roma lið að þessu sinni. Einbeittara og skipulagðara lið sem mun standa sig mun betur," sagði Capello.