Mancini: Sagan getur endurtekið sig

Roberto Mancini þjálfari Inter segist viss um að hans menn geti skorað þrjú mörk gegn Liverpool á heimavelli sínum annað kvöld. Þá mætast liðin öðru sinni í 16-liða úrslitum Meistaradeildarinnar þar sem enska liðið hefur 2-0 forystu frá fyrri leiknum.

"Við þurfum þrjú mörk til að komast áfram og þetta lið getur skorað þrjú mörk. Liverpool skapaði sér ekki mörg færi í fyrri leiknum þó liðið hefði vissulega pressað á okkur, en því miður voru lokamínúturnar okkur dýrar. Ég held samt að við getum klárað þetta - ekkert er útilokað," sagði Mancini og vísaði til sögulegrar viðureignar liðanna fyrir rúmum fjórum áratugum.

Liverpool vann fyrri leik liðanna í Evrópukeppninni þá 2-0 en tapaði svo síðari leiknum á Ítalíu 3-0.

"Það er kannski tilviljun en kannski er sagan að endurtaka sig," sagði Mancini.