Íslenskt réttardrama væntanlegt næsta vetur

Það stefnir vafalaust í fráhvarfseinkenni hjá mörgum nú þegar síðasti þátturinn af Pressu er afstaðinn og búið að afhjúpa hinn illa Davíð. Þeir geta þó tekið gleði sína á ný, en nýtt réttardrama úr smiðju Sigurjóns Kjartanssonar er væntanlegt á Stöð 2 á næstu misserum.

„Jú, þetta er pípunum", „Þátturinn verður sýndur eftir næstu áramót, með þeim fyrirvara að það náist styrkur," segir Sigurjón, sem skrifar þessa dagana handrit að þættinum ásamt þeim Margréti Örnólfsdóttur og Kristni Þórðarsyni, sem meðal annars skrifaði handritið að Kaldri slóð.

Pressa var fyrsta dramaverkefni Sigurjóns, sem hefur um árabil verið einn þekktasti grínari landins, en verður samkvæmt þessu ekki það síðasta. „Ég myndi kannski segja að ég sé að þroskast í þessa átt," segir Sigurjón. Hann bætir við að hann myndi í sjálfu sér ekki gráta það væri honum sagt að hann hefði skrifað sinn síðasta skets. „Það er ekki vaninn að menn séu að skrifa sketsa í tuttugu ár. Maður er kominn í annan gír sem er mjög skemmtilegur."

Sigurjón segir að þetta form veiti ýmsa möguleika sem sketsarnir gera ekki. „Það er gríðarlegum heimur sem opnast. Þú hefur tækifæri til að búa til heim með ákveðnum karakterum og öllu þeirra lífi undirliggjandi," segir Sigurjón, og veltir upp því sem gæti komið fyrir Láru í næstu seríu, „Byrjar hún í sambúð, hvernig heldur þetta áfram á ritstjórn póstsins, verður hún gerð að fréttastjóra?"

En stendur þá til að gera aðra þáttaröð af Pressu? „Formattið er mjög vænt til áframhalds," segir Sigurjón. „Það verður síðan að koma í ljós hvernig er að fjármagna slíkt, en við stefnum að því."

Samkvæmt fyrstu könnunum var Pressa með ívið meira áhorf en sjálf Næturvaktin, sem sprengdi öll met í desember. Sigurjón segir að velgengni íslenskra glæpasagna hafi hjálpað til að ryðja brautina fyrir íslenskt sakamáladrama. „Fólk kaupir það núorðið að það séu framdir glæpir hér."