Semur mótmælasöngva gegn nýjum meirihluta

„Ég var beðinn um að spila á Sirkustónleikum og fannst asnalegt að mæta með eitthvað sem er málinu óviðkomandi, ég ákvað því að semja nokkur lög sem pössuðu þessu tilefni," segir Gunnar Lárus Hjálmarsson tónlistarmaður.

Gunnar Lárus sem alltaf er kallaður Dr. Gunni samdi fjögur mótmælalög á hálftíma eitt föstudagskvöldið. „Síðan fannst mér þetta svo gott að ég ákvað að búa til plötu með þessu," segir doktorinn en hægt er að hala lögunum niður á heimasíðu hans.

Nöfnin á lögunum eru í takt við yrkisefnið og heita Helvítis gráðugu fífl, Legókubbar auðvaldsins, Gamli góð Villi og Handrukkarar lýðræðisins.

„Þetta eru alvöru mótmælasöngvar og þar dugar engin kurteisi," segir Dr. Gunni sem komst síðan ekki á Sirkus eftir allt saman.

„Ég sendi bara mp3 þar sem ég má ekki fara út svona seint á kvöldin. Ég held að þetta hafi verið spilað, eða ég vona það," segr doktorinn en hátt í þúsund manns hafa náð sér í lögin.

„Ég ákvað líka að gera þetta með gamla laginu, mér finnst svo gaman að föndra með U-HU líminu," segir Gunni en hægt er að panta plötuna og fá hana senda heim.

Fimmtán eintök eru seld að sögn Gunna en platan er virðingarvottur við aðra plötu sem kom út fyrir mörgum árum. „Þá söng hann Böðvar Guðmundsson söngva á móti herliðinu á Keflavíkurflugvelli. Það kannski fatta einhverjir þá tengingu," segir Gunni og hlær.

Aðspurður hversvegna hann hafi ákveðið að mótmæla á þennan hátt en ekki mæta og æpa niður í Ráðhúsi segir Gunni: „Þetta er persónulegra og mitt innlegg í umræðuna. Ég skammast mín ekkert fyrir þetta ennþá, það kemur kannski seinna."

Í laginu Gamli Góði Villi er hart skotið en þar segir Gunni meðal annars:

Gamli góði Villi með hártoppinn sinn

Hann er kominn aftur með geðsjúklinginn

Hægt er nálgast plötuna á heimasíðu Dr. Gunna með því að smella hér.