Viddi Greifi flytur inn Jack Canfield

„Þetta er einn eftirsóttasti fyrirlesari heims í dag og talar um hvernig hægt er að bæta líf sitt í leik og starfi," segir Kristján Viðar Haraldsson sem er að flytja inn Jack Canfield sem hjálpar fólki að ná árangri í lífinu.

Krisján Viðar betur þekktur sem Viddi í Greifunum er menntaður sálfræðingur og segist alltaf hafa haft áhuga á þessum málum. Canfield mun koma til landsins á morgun og flytja fyrirlesturinn „Lögmál sigurgöngunnar" í Háskólabíó á laugardaginn.

„Ég vildi nú bara láta gott af mér leiða og leyfa fólki að kynnast honum. Sjálfur er ég mikill aðdáandi hans en hann er stærsta nafnið í þessu í dag," segir Viddi en Canfield kemur meðal annars fram í hinni vinsælu mynd Secret. Einnig er hann vinsæll í spjallþáttum í Ameríku og er reglulegur gestur hjá Larry King. „Síðan er hann í Opruh í kvöld á Stöð 2."

Canfield hefur selt margar milljónar bóka undir merkinu Chicken soup for the Soul en Viddi heillaðist af kappanum fyrir nokkrum árum. „Það sem hann hefur er hversu hlýr og viðkunnanlegur hann er. Þegar hann flytur fyrirlestur uppi á sviði er það eins og hann standi við hliðina á þér," segir Viddi.

Aðspurður um hvernig maður fái eins virtan fyrirlesara og Jack Canfield hingað til lands segir Viddi: „Ég tók nú bara upp símann og hringdi í hann," segir Viddi og hlær en hann segir þetta hafa tekið langan tíma og hafi verið mikið ævintýri.

„Þessi kappi er bara í sama verðflokki og þessar rokkhljómsveitir sem hafa verið að koma hingað. Ég hef samt aldrei séð Tommy Lee hjá Larry King."

Námskeiðið á laugardaginn er frá 10:00 til 16:30 og er hægt að fá miða í ódýrustu sætin á 19.900 krónur. Dýrustu miðarnir eru síðan á 67.900 en þeim fylgir matur og bók eftir Jack Canfield.