Lúxussnekkja Saddams til sölu á Íslandi

Lúxussnekkja Saddams Husseins, sem Vísir greindi frá að væri til sölu á dögunum, er nú skráð á sölu hjá Viðskiptahúsinu. „Þetta var bara gert í góðu gríni" segir Vilhjálmur Ólafsson, fasteigna og skipasali hjá Viðskiptahúsinu. „Mér þótti þetta bara fyndin frétt."

Vilhjálmur fann myndir á netinu og skellti snekkjunni inn á vefinn, með orðalagi sem kannski er ekki alveg hefðbundið í heimi skipasölu.

Skútunni er lýst svo: „Dollan státar meðal annars af þyrlupalli og um borð er sagður allur sá lúxus sem nokkur maður getur óskað sér." Þá er hún sögð geta verið farkostur fyrir óvinsæla menn, því allir gluggar séu með skotheldu gleri og hægt sé að setja upp þungar vélbyssur víðsvegar meðfram borðstokknum.

En öllu gríni fylgir einhver alvara. Þó Viðskiptahúsið sé ekki með beint umboð fyrir snekkjunni, þá getur það haft umsjón með kaupunum hafi fólk áhuga á lúxusfleyinu. „Það er í sjálfu sér ekkert mikið fyrirtæki, við gerum þetta alla daga og erum með réttindi og þekkingu til." segir Vilhjálmur. Hafi fólk áhuga á ákveðnu skipi sér Viðskiptahúsið því um að setja sig í samband við eigendur, og hafa umsjón með sölunni. Fólk þarf þó að eiga krónu eða tvær í banka, en ásett verð á fleyinu er 2,1 milljarður. Þá er ótalinn kostnaður vegna viðhalds og launa. Vilhjálmur segir ekki fjarri lagi að tíu manns þurfi í vinnu við að viðhalda skipinu og sigla því.

Hann sér þó fyrir sér að skútan gæti nýst hér heima. ,,Nú er gríðarlega aukinn áhugi á Íslandi sem ferðamannalandi. Væri ekki grundvöllur fyrir því að selja lúxussiglingar hringinn kringum landið?, spyr Vilhjálmur. „Þessi væri kjörin í svoleiðis"