Segir ákvörðun umhverfisráðherra fleyg í stjórnarsamstarfið

Á meðan að ákvörðun umhverfisráðherra að umhverfismat eigi að fara fram vegna fyrirhugaðs álvers á Bakka er ekki útskýrð lítur Kristján Þór Júlíusson, þingmaður Sjálfstæðisflokksins og varaformaður iðnaðarnefndar, á ákvörðunina sem fleyg í ríkisstjórnarsamstarfið. Hann er undrandi yfir ákvörðun Þórunnar.

Fyrr í dag ákvað umhverfisráðherra að heildstætt mat skuli fara fram á umhverfisáhrifum vegna fyrirhugaðs álvers á Bakka við Húsavík. Skipulagsstofnun hafði ákveðið að slíkt mat skyldi ekki fara fram. Meta á allt svæðið í einu, það er að segja álverið á Bakka, Þeistareykjavirkjun, Kröfluvirkjun II og háspennulína frá Kröflu og Þeistareykjum til Húsavíkur.

,,Þessi ákvörðun kemur kemur eins og þruma úr heiðskíru lofti og á meðan þetta er ekki útskýrt lít ég svo á að þetta sé fleygur inn í núverandi stjórnarsamstarf," segir Kristján.

Samfylkingin er klofin í afstöðunni til stóriðjuframkvæmda, að sögn Kristjáns. ,,Flokkurinn er einnig klofin í afstöðu sinni til nýtingar á auðlindum landsins, hvort heldur til lands eða sjávar. Á meðan að Samfylkingin kemur sér ekki saman um sameiginlega stefnu verður samstarfið erfitt," segir Kristján og bendir á að hann sé einungis að lýsa raunveruleikanum eins og hann blasir við sér.

Miðað við núverandi stöðu í efnahagsmálum segist Kristján hafa talað fyrir því helstu auðlindir landsins verði nýttar. ,,Við þurfum með öllum ráðum að nýta auðlindir til lands og sjávar til að koma þjóðinni í gegnum þær þrengingar sem við stöndum frammi fyrir á þessari stundu."