Bruce harmar að hafa ekki keypt Zaki

Steve Bruce, knattspyrnustjóri Wigan, sér eftir því í dag að hafa ekki fest kaup á Egyptanum Amr Zaki sem hefur slegið í gegn í ensku úrvalsdeildinni í haust.

Zaki er á mála hjá El Zamalek í heimalandi sínu sem fór fram á 7,25 milljónir punda fyrir hann í sumar. Niðurstaðan varð hins vegar sú að Zaki yrði lánaður til Wigan út tímabilið.

Nú hefur Zaki skorað sjö mörk í átta leikjum og er markahæsti leikmaður ensku úrvalsdeildarinnar. Ef Wigan ætlar sér að halda honum í sínum röðum er viðbúið að það þurfi að greiða enn hærri upphæð fyrir hann í vor.

Mörg félög í úrvalsdeildinni eru sögð hafa áhuga á Zaki og gæti það orðið þrautinni þyngri að halda honum hjá Wigan.

„Ég sagði Zamalek að ef þeir vildu fá svona háa upphæð fyrir hann þyrfti hann að spila fyrst í ensku deildinni. Verðið var of hátt og var ástæðan fyrir því að við fórum þessa leið."

„Ég var ekki reiðubúinn að borga uppsett verð. Það er alltaf mikil áhætta fólgin í því fyrir félag eins og okkar. Zamalek samþykkti svo lánssamninginn og hann hefur staðið sig vel. Því betur sem hann stendur sig því meira mun hann kosta."