Innlent

Með minni Suðurlandsskjálftum þrátt fyrir mikla eyðileggingu

Kortið sýnir upptök skjálftans í Grímsnesinu við Þrastalund.
Kortið sýnir upptök skjálftans í Grímsnesinu við Þrastalund.

Suðurlandsskjálftinn í dag er með minni Suðurlandsskjálftunum síðan að mælingar hófust en nú er talið að hann hafi verið um 6,2 stig á Richters-kvarða.

Venjulega losnar um spennu á hundrað ára fresti á Suðurlandsskjálftabeltinu en spennan getur þó verið að leysast úr læðingi yfir nokkra ára tímabil. Þannig urðu fimm skjálftar á svæðinu árið 1896 sem allir voru stærri en jarðskjálftinn í dag, eða á bilinu 6,5 til 6,9 stig.

Árið 1912 varð síðan annar skjálfti á svæðinu upp á 7 stig. Það er því ekkert sérstaklega óvænt að stór skjálfti ríði yfir Suðurland svo stuttu eftir skjálftana árið 2000 en þeir mældust 6,5 og 6,6 stig. Allt eru þetta stærstu skjálftar sem mælst hafa hérlendis en fyrir norðan, nálægt Skjálfanda, hafa einnig mælst stórir skjálftar, sá stærsti árið 1963 á Málmeyjargrunni en hann mældist 7 stig.

Ástæðan fyrir því að skjálftinn í dag olli svona mikilli eyðileggingu þrátt fyrir að vera ekki stærri en raun bar vitni var sú hversu upptök hans voru ofarlega í jarðskorpunni. Eyðilegging er þó ekki nærri eins mikil og varð í Suðurlandskjálftunum bæði árið 1784 og 1896 en þá létust nokkrir og hundruð húsa féllu.

Allt bliknar þetta þó samanborið við stærsta jarðskjálfta sögunnar sem átti sér stað árið 1960 í Chile og mældist 9,5 stig. Þá létust rúmlega tvö þúsund manns og tvær milljónir manna misstu heimili sín. Aðrir nýlegir skjálftar sem hrellt hafa íbúa jarðarinnar eru einnig töluvert stærri en það sem þekkist hérlendis. Þannig var skjálftinn undan ströndum Súmötru annan dag jóla árið 2004 heil 9 stig og skjálftinn sem nýlega felldi hátt í hundrað þúsund manns í Kína mældist 7,9 stig á Richter.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.