Fylkismenn leita réttar síns vegna Ian Jeffs

Stjórnarmenn í knattspyrnudeild Fylkis eru að skoða rétt sinn vegna Ian Jeffs sem gekk í raðir Vals í gær. Ríkisútvarpið greinir frá því að forráðamenn Árbæjarliðsins telji að Jeffs hafi verið samningsbundinn Fylki og Valsmenn því ekki haft rétt á að semja við leikmanninn.

Samkvæmt heimildum Ríkisútvarpsins skilaði Fylkir ekki leikmannasamningi til KSÍ en hann er forsenda þess að samningar milli leikmanns og félags séu í gildi. Því er það skilningur Vals að að félagið þurfi aðeins að greiða 100 þúsund króna félagaskiptagjald fyrir Jeffs sem Fylkir keypti á miklu mun hærri upphæð frá Örebro í Svíþjóð fyrir ári síðan.

Ekki er skylt að allir leikmenn séu á leikmannasamningi KSÍ en á því mun verða breyting á næsta ári. Að framangreindu má ætla að félagssamningur Jeffs við Fylki hafi ekki verið gildur og Valsmönnum því heimilt að semja við leikmanninn um félagsskipti án aðkomu Fylkis.

Frammistaða Ian Jeffs í sumar var langt undir væntingum. Sjálfur sagði Jeffs í sjónvarpsviðtali í gær að hann hafi verið mjög ósáttur við gengi sitt í ár og vildi byrja frá grunni hjá nýju félagi. Því hafi hann ákveðið að semja við Val.