Davíð Þór: Áttum þetta skilið

Davíð Þór Viðarsson, fyrirliði FH, var kampakátur í leikslok eftir sigur sinna manna á Keflavík í dag.

Með sigrinum eiga FH-ingar enn möguleika á Íslandsmeistaratitlinum en þurfa að stóla á að Fram geri Keflvíkingum skráveifu í lokaumferðinni.

„Þetta var frábært. Við vorum tilbúnir frá fyrstu mínútu og mér fannst við eiga þetta fyllilega skilið. Við vorum samt algjörir aular að hleypa þeim aftur inn í leikinn."

FH var í góðri stöðu, 2-0, þegar um stundarfjórðungur var til loka og Keflvíkingar náðu að jafna metin á stuttum tíma. Atli Viðar Björnsson tryggði hins vegar FH sigur með marki á lokamínútunum.

„Við vorum bara kærulausir. Við vorum að sækja á of mörgum mönnum í þessari stöðu. Þeir komust í upphlaup og nýttu sér það enda öflugir í skyndisóknum. En mér er svo sem alveg sama þar sem við unnum í lokin."

FH mætir Breiðabliki í frestuðum leik á miðvikudaginn og verða að vinna til að halda meistaravonum sínum á lífi.

„Nú eigum við tvo úrslitaleiki eftir og það er vonandi að Framarar geri Keflvíkingum grikk eins og þeir gerðu okkur grikk. Þá verðum við Íslandsmeistarar, þannig er það bara."