Kvarta við kaupmenn ef þörf er á

Innflutt grænmeti er í mörgum tilfellum merkt á íslensku þannig að neytendur átta sig ekki á því að um erlenda framleiðslu er að ræða. Árni Johnsen, þingmaður Sjálfstæðisflokksins, vakti máls á þessu á Alþingi í dag. Hann sagði að erlent grænmeti væri skolað upp úr íslensku vatni og selt sem íslenskt grænmeti

„Við könnumst við þetta í garðyrkjunni þar sem menn hafa verið að merkja þetta og gefa til kynna að þetta sé íslenskt, meðvitað og ómeðvitað," segir Þórhallur Bjarnason, formaður Sambands garðyrkjubænda.

Þórhallur segir að garðyrkjumenn hafi því fundið krók á móti bragði og farið í gang með fánaröndina. Merki íslenska fánans sé sett á alla innlenda framleiðslu þannig að neytendur geti treyst því að þeir fái íslenska vöru. Þórhallur segir að fánaröndin hafi hjálpað mikið. „Við höfum ekki orðið varir við að hún væri misnotuð," segir Þórhallur.

Þórhallur segist ekki kannast við það að garðyrkjubændur veigri sér við að gera athugasemdir við kaupmenn, telji þeir þess þurfa. „Við erum alveg óhræddir að gera athugasemdir ef að við teljum að verið sé að brjóta lög eða misnota fánaröndina," segir Þórhallur. Hann telur hins vegar að kaupmenn séu ánægðir með fánaröndina. „Mér sýnist þetta bara vera eitthvað sem kaupmenn vilji hafa," segir hann.