Fáir vilja vera vinir Paris Hilton

Leitin að nýjasta vini Parisar Hilton gengur illa. Á dögunum var auglýst eftir „heitum tæfum og geggjuðum gaurum" til að taka þátt í raunveruleikaþætti þar sem leitað er að nýjum vini fyrir hótelerfingjann.

Áhugasamir þurftu að svara löngum spurningalistum, með heimspekilegum vangaveltum á borð við: „Ef þú væri með Paris og paparassarnir tækju bara myndir af henni en ekki þér, hvað myndirðu gera?" Áheyrnarprufur voru svo haldnar í New York, en einungis 40-50 manns sáu ástæðu til að mæta í þær.

Samkvæmt heimildum OK tímaritsins þótti áhugaleysið svo vandræðalegt að aðstandendur þáttarins afboðuðu fjölmiðla, sem höfðu ætlað að fjalla um áheyrnarprufurnar, í snarhasti.

Þeir fjölluðu þó samt um þær, og fór Paris sjálf því í björgunaraðgerðir. Hún skrifaði á MySpace síðu sína að aldrei hefði staðið til að halda opnar áheyrnarprufur. Þeir sem hefðu mætt hefðu allir verið sérvaldir og boðaðir, enda stæði ekki til að hún léti tilvonandi bestu vini sína bíða í löngum röðum. Yfirklórið var þó ekki sannfærandi, því áheyrnarprufurnar höfðu verið auglýstar rækilega fyrirfram á vefsíðum á borð við Realitywanted.com.

Áætlað er að tökur á þættinum hefjist í lok maí.