ASÍ og SA sammála um að ESB-aðild þurfi til

Alþýðusamband Íslands og Samtök atvinnulífsins eru sammála um að sækja beri um aðild að Evrópusambandinu og að evra verði tekin upp. Forseti ASÍ lítur svo á að í raun sé búið að taka ákvörðun um það fyrir löngu.

Grétar Þorsteinsson, forseti ASÍ, segir að ef aðgerðir sem grípa á til í efnahagsmálum eigi að skila árangri þurfi að koma þeim skilaboðum skýrt út í hinn stóra heim. Skýr skilaboð séu tilkynningar um upptöku evru og inngöngu í Evrópusambandið.

Grétar segir ASÍ og Samtök atvinnulífsins samstiga í þessu máli. Þau séu samstiga og megi hafa skoðun á málinu ólíkt því sem sumir haldi fram.

Forseti Alþýðusambands Íslands er reyndar á því að búið sé að taka ákvörðun um þetta fyrir löngu, spurningin snúist um hvenær þessu verði hrint í framkvæmd. Hann segir að þegar ákveðið var að taka þátt í alþjóðlegu fjármálalífi, að ekki sé talað um þegar útrásarvíkingarnir fóru af stað, hafi verið tekin ákvörðun um að skipta um mynt. Þetta sé einungis spurning um tíma.