Kjartan semur við Fylki

Kjartan Ágúst Breiðdal hefur samið við Fylki til næstu þriggja ára en hann er uppalinn leikmaður hjá félaginu.

Fyrir höfðu þeir Fjalar Þorgeirsson og Þórir Hannesson framlengt sína samninga og þá er allt útlit fyrir að Ólafur Ingi Stígsson leiki aftur með Fylki á næsta tímabili eins og hann sagði í samtali við Vísi á dögunum.

Fylkismenn hafa misst þá Ian Jeffs, Allan Dyring og Björn Orra Hermannsson og ekki eru miklar líkur á því að Peter Gravesen verði áfram hjá félaginu.

Haukur Ingi Guðnason, Hermann Aðalgeirsson og Víðir Leifsson eiga allir í samningaviðræðum við Fylki þessa dagana.

Kjartan lék sinn fyrsta leik með meistaraflokki karla árið 2003 og hefur samtals spilað 33 leiki og skorað í þeim fimm mörk. Hann er 22 ára gamall.