Valur hefur sýnt Ólafi Páli áhuga

Ólafur Páll Snorrason segir að framtíð sín sé óráðin í knattspyrnunni en að hann viti af áhuga nokkurra félaga, þar á meðal frá Val.

„Ég hef ekkert rætt við Valsmenn en það er aldrei að vita hvað framtíðin ber í skauti sér," sagði Ólafur Páll við Vísi. Hann er nú samninslaus en hefur leikið Fjölni undanfarin tvö ár.

Félagi Ólafs Páls hjá Fjölni, Pétur Georg Markan, hefur einnig verið orðaður við Valsmenn.

Ólafur Páll ætlar þó fyrst að ræða við Fjölnismenn áður en hann skoðar aðra möguleika. „Ég ætla fyrst að reyna að ná samningum við Fjölni en ef það gengur ekki eftir er aldrei að vita hvað gerist."