Ballack hefur ekki áhyggjur af samningsmálum

Michael Ballack segir að samningastaða sín hjá Chelsea sé ekkert áhyggjuefni og hafi ekki áhrif á frammistöðu hans á vellinum.

Samningur Ballack rennur út næsta sumar og hann hefur ekki enn hafið viðræður við forráðamenn Chelsea um nýjan samning.

Ballack hefur átt við meiðsli að stríða undanfarið en hefur allur verið að koma til.

„Ég hef engar áhyggjur af minni samningsstöðu. Sem leikmaður verður manni að líða vel hjá viðkomandi félagi og ég sé enga ástæðu þess efnis að ég ætti að fara til annars félags."

„Ég er ekki lengur 25 ára og að velta fyrir mér til hvaða félags ég gæti farið til næst. Ég er núna að spila fyrir eitt stærsta félag heims. Við getum enn bætt okkur og vil ég hjálpa til í því verkefni."

„Mér finnst að ég eigi nóg inni og tel ég að ég búi yfir mikilli reynslu. Ég er enn í góðu formi og get ég get vel séð fyrir mér að ég klári ferilinn hjá Chelsea."

„Við viljum auðvitað vinna stóra titla og komumst nálægt því að vinna Meistaradeildina á síðasta tímabili. Chelsea getur skráð nafn sitt á spjald sögunnar og vil ég taka þátt í því."