Átta rauð spjöld í leikjum dagsins

Það var sannarlega mikið fjör í leikjum dagsins í Landsbankadeild karla í knattspyrnu. Sex vítaspyrnur voru dæmdar í leikjunum fimm og átta menn fengu að líta rauð spjöld.

Mesta fjörið var í leik Fram og Grindavíkur á Laugardalsvellinum en þar fengu þrír leikmenn Grindavíkur reisupassann. Þetta voru þeir Scott Ramsay, Marinko Skaricic og Zoran Stamenic. Þá voru misnotaðar tvær vítaspyrnur í leiknum - ein á hvort lið - en það voru þeir Andri Steinn Birgisson hjá Grindavík og Paul McShane hjá Fram sem klikkuðu á spyrnum sínum.

Þar með var ekki öll sagan sögð á Laugardalsvellinum, því þeir Milan Stefán Jankovic, þjálfari Grindavíkur, og Ingvar Guðjónsson framkvæmdastjóri liðsins fengu einnig að líta rauða spjaldið að leik loknum.

Tvær vítaspyrnur voru dæmdar í leik Keflavíkur og KR í Keflavík og úr þeim skoruðu þeir Guðmundur Steinarsson og Björgólfur Takefusa.

Davíð Þór Viðarsson fékk að líta rauða spjaldið í leik FH og Fjölnis og sömu sögu var að segja af Stefáni Þórðarsyni hjá ÍA - en hann fékk reyndar rauða spjaldið annan leik sinn í röð. Vjekoslav Svadumovic skoraði jöfnunarmark ÍA úr vítaspyrnu í leiknum.

Atli Sveinn Þórarinsson fékk að líta rauða spjaldið í leik Íslandsmeistara Vals og Breiðabliks og þar misnotaði Blikinn Prince Rajcomar vítaspyrnu.

Í fréttinni í tenglinum hér fyrir neðan er stiklað á stóru yfir það helsta sem gerðist í leikjum dagsins, en nánari umfjöllun um leikina kemur hér á Vísi snemma í fyrramálið.