Ráðningin til Chelsea hafði slæm áhrif á Portúgal

Arsene Wenger telur að ráðning Luiz Felipe Scolari til Chelsea hafi haft slæm áhrif á gengi Portúgals á Evrópumótinu. Scolari stýrði Portúgal en meðan á mótinu stóð var tilkynnt að hann væri á förum og myndi taka við Chelsea.

Portúgalska knattspyrnusambandið var ósátt við tímasetninguna á þessari tilkynningu og Wenger telur að hún hafi haft áhrif.

„Það er erfitt að takast á við svona tilkynningar. Það gefur liðinu ekkert, tekur bara frá því," sagði Wenger en Portúgal féll úr leik eftir að hafa tapað fyrir Þýskalandi í átta liða úrslitum mótsins.

„Þegar sögurnar fara að berast í blöðin þá fara þær að berast í leikmannahópinn," sagði Wenger sem fagnar því hinsvegar að fá Scolari í enska boltann. „Mér líkar vel við Scolari persónulega og sem þjálfara. Hann gæti komið með eitthvað nýtt í deildina."