Um helmingur kambódísku þjóðarinnar eru undir 25 ára aldri. Um 50.000 börn eru án menntunar sem jafngildir fjölda allra grunnskólabarna á Íslandi. Kambódía á sér mikla en átakanlega sögu. Þriggja áratuga stíð setti mark sitt á þjóðina en friður komst á í landinu fyrir níu árum. Afleiðingar stríðsátakanna eru gífulegar.
Rauðu Khmerarnir brutu niður innviði samfélagsins og reyndu að útrýma kennurum, læknum og menntafólki. Stór hluti þessarra þjóðfélagsþegna voru fangelsaðir í S-21 öryggisfangelsinu þar sem fangar voru yfirheyrðir, pyntaðir og teknir af lífi.
Barnaheill á Íslandi hefur stutt verkefni Barnaheilla í Kambódíu í tæp þrjú ár í náinni samvinnu við Barnaheill í Noregi sem stjórnar verkefninu. Markmið samtakanna er að byggja upp skólastarf í sveitahéruðum þar sem heilu kynslóðirnar hafa farið á mis við menntun vegna átaka í landinu.
Brynja Dögg Friðriksdóttir fréttmaður og Jakob Halldórsson tökumaður í Kompási, eru nýkomin frá Kambódíu þar sem þau kynntu sér uppbyggingastarf Barnaheilla í héraðinu Kampong Cham. ,,Þetta var einstök upplifun. Við heimsóttum meðal annars þorpið Veal Bompong sem er mjög afskekkt þorp í Kambódíu. Skærur voru í héraðinu allt fram til ársins 1999. Það hafa aldrei ferðamenn komið í þorpið og margir íbúanna hafa aldrei séð hvítt fólk áður. Fæstir hinna fullorðnu eru læsir og hreint vatn er af skornum skammti," segir Brynja Dögg.
Mikil uppbygging hefur átt sér stað í landinu og ljóst er að miklar breytingar munu verða á efnahag landsins á næstu árum. ,,Þetta er stórkostlegt land með mikla menningararfleið. Þjóðarstolt Kambódíumanna, Angkor Wat hofið, ættu flestir að þekkja en landið hefur upp á svo miklu meira að bjóða," segir Jakob.
Sýnt verður frá ferðinni í síðasta Kompásþætti vetrarins annað kvöld kl:21:50 á Stöð 2.
