Hugmynd Haralds hefur kosti og galla

Hugmynd Haralds Johannessen, ríkislögreglustjóra, að færa fjárveitingar til lögreglumála til embættis ríkislögreglustjóra hefur kosti og galla, að mati Snorra Magnússonar formanns Landssambands lögreglumanna.

Í ársskýrslu ríkislögreglustjóra fyrir síðasta ár kemur fram að Haraldur er þeirra skoðunar að færa eigi fjárveitingarnar til ríkislögreglustjóra. Bæði Jóhann R. Benediktsson, lögreglustjóri á Suðurnesjum, og Björn Bjarnason, dómsmálaráðherra, hafa í samtölum við Vísi lýst sig andsnúna hugmyndinni.

,,Hugmynd Haralds snýr að meiri miðstýringu. Við hjá Landssambandinu höfum ekki enn myndað okkar skoðun á málinu en við munum þó gera það," segir Snorri og bætir við að hugmyndin hafi kosti og galla en snúist að miklu leyti um útfærslu. Hann vildi lítið tjá sig um málið fyrr en Landssambandið hefði tekið það fyrir.