Ráðherra ósammála Ríkislögreglustjóra

Björn Bjarnason, dómsmálaráðherra, deilir ekki þeirri skoðun með Haraldi Johannessen, ríkislögreglustjóra, að færa eigi fjárveitingar til lögreglumála til embættis ríkislögreglustjóra.

,,Ég er ekki þeirrar skoðunar að fjárveitingar til lögreglumála renni í gegnum embætti ríkislögreglustjóra," segir Björn.

Í nýbirtri ársskýrslu ríkislögreglustjóra fyrir síðasta ár kemur fram að Haraldur er þeirra skoðunar að færa eigi fjárveitingarnar til ríkislögreglustjóra. Hann segir einnig í skýrslunni að fækka eigi lögreglustjóraembættum enn frekar, en þeim var síðast fækkað fyrir ári.

Björn segist hafa kynnt hugmyndir um að landinu verði skipt í sex lögregluumdæmi. Að hans sögn eru þær hugmyndir nú til umræðu meðal lögreglumanna, lögreglustjóra og sýslumanna.