Utanríkisráðherra ræddi viðskiptamál við ítalskan starfsbróður

Ingibjörg Sólrún Gísladóttir utanríkisráðherra fundaði í dag með Franco Frattini, utanríkisráðherra Ítalíu, í Róm. Þar ræddu þau meðal annars mikilvægi þess að fullgilda tvísköttunarsamning landanna. Kvaðst Frattini myndu beita sér fyrir fullgildingu samningsins en Íslendingar hafa þegar fullgilt hann.

Á heimasíðu utanríkisráðuneytisins segir að önnur viðskiptamál landanna hafi einnig verið rædd auk þess sem ráðherrarnir ræddu framboð Íslands til öryggisráðs Sameinuðu þjóðanna og málefni EES og þróunarsjóðs EFTA.