Gönguferðir á ensku

Borgarbókasafnið í Reykjavík hefur um nokkurra ára bil boðið borgarbúum og nærsveitamönnum upp á kvöldgöngur með bókmenntalegu ívafi. Þá hefur safnið bætt við og leggur í gönguferðir fyrir enskumælandi og enskuskiljandi gesti síðan 2003 í júlí og ágústmánuði. Eru göngurnar vikulega á fimmtudagskvöldum og lagt upp frá aðalsafninu í Grófinni. Markmiðið er að kynna íslenskar bókmenntir fyrir erlendum göngugestum, hvort sem þeir eru ferðamenn eða búsettir hér á landi. Göngurnar eru framlag Borgarbókasafnins til menningarlegrar ferðaþjónustu, með sérstakri áherslu á að kynna borgina í ljósi bókmennta og sögu.

Alltaf er um sömu göngu að ræða, þ.e. hvert sumar er dagskrá göngunnar eins frá viku til viku. Tekur gangan um eina og hálfa klukkustund. Leiðsögumaður er Úlfhildur Dagsdóttir bókmenntafræðingur og með henni er bandarískur leikari sem búsettur er á Íslandi, Darren Foreman, en hann fer með textana sem kynntir eru í göngunni.

Gestgjafar hér á landi ættu að benda gestum sínum á þessa vikulegu dægrastyttingu sem opnar gestkomandi nýjan glugga og sýn í samfélagið hér við Víkina.- pbb