Gylltur nautsrass veldur hruni markaða

Skýringin á hruni verðbréfamarkaða á Indlandi er fundin. Hana er að finna í afstöðu afturenda eins og hálfs metra hárrar bronsstyttu af nauti fyrir utan kauphöllina í Mumbai. Indverjar eru þekktir fyrir ást sína á nautgripum, en þessi veldur þeim hugarangri.

Bolinn var settur upp við austurinngang kauphallarinnar þann tólfta janúar - sama dag og markaðurinn tók sína fyrstu dýfu. Þetta segja miðlararnir enga tilviljun.

Nautið horfir út á götuna fyrir framan kauphöllina, og snýr gylltum afturendanum í miðlarana sem sitja sveittir fyrir innan að reyna bjarga því sem bjargað verður. Þetta þykir ekki góður fyrirboði. Miðlararnir fóru því farið fram á að trúarsérfræðingur færi yfir málið og finndi út úr því í hvaða átt botnsstykki bola ætti að snúa svo markaðurinn taki við sér.

Hann stakk upp á að styttan yrði færð að aðalinngangi og myndi snúa þar í norðurátt, þar sem allar aðrar staðsetningar fyrir nautið myndu valda frekari vandræðum.

Trúarlegar tilfæringar af þessu tagi eru alvanalegar í kauphöllinni. MG Damani, forstjóri hennar, lét til að mynda endurraða öllum húsgögnum í skrifstofu sinni eftir leiðbeiningu Vaastu-sérfræðings þegar hann tók við starfinu. Boli er heldur ekki einn um að hafa verið kennt um hrun markaðarins. Um miðjan níunda áratuginn var tré fellt til að stækka mætti kauphöllina, og nær umsvifalaust féllu markaðir. Sögðu miðlarar þá að þeim hefndist fyrir að hafa valdið trénu sársauka.