Flóttafólkinu á Akranesi farnast vel - Mæðurnar í blaki

Daglegt líf palestínska flóttafólksins sem kom til landsins fyrir rúmum mánuði gengur afar vel, að sögn Lindu Bjarkar Guðrúnardóttur verkefnastjóra hjá Akranesbæ.

,,Það er nóg um að vera. Börnin eru komin af stað í leik- og grunnskólum og mæðurnar eru í íslenskunámi og samfélagsfræðslu," segir Linda og bætir við að hluti af samfélagsfræðslunni sé starfsþjálfun.

,,Við gerum ráð fyrir að mæðurnar verði byrjaðar í hlutastörfum eftir rúmlega sex mánuði," segir Linda. Hvenær og í hvaða formi starfsþjálfunin verður mun ráðast af aðstæðum hvers og eins þegar þar að kemur.

Fjölskyldurnar eru mikið í sundi og þá eru nokkrar mæður farnar að æfa blak. ,,Þær eru afskaplega ánægðar." Börnin stunda einnig íþróttir á borð við fótbolta og karate. Oftar en ekki hafa þau byrjað að æfa í gegnum stuðningsfjölskyldunnar, að sögn Lindu.

Fjölskyldunnar aðstoða flóttafólkið við að tengjast samfélaginu og er því innan handar við aðlögun. Að mati Lindu hafa þær reynst flóttafólkinu afskaplega vel.

Aðlögun flóttafólksins að nýju landi og breyttu umhverfi hefur gengið vel og án meiriháttar vandræða, að mati Lindu. ,,Það er einna helst að fara þurfti yfir umferðarreglurnar með börnunum eftir að okkur bárust ábendingar frá áhyggjufulllum bílstjórum í bæjarfélaginu.." Í framhaldinu fengu börnin umferðarfræðslu og hjálma að gjöf eftir að þau voru komin á hjól.

Hópurinn kom til landsins frá Al Waleed flóttamannabúðunum í Írak 8. september eftir langt ferðalag í gegnum Sýrland. Þau eru frá Palestínu en hafa mörg hver dvalið í búðunum við skelfilegar aðstæður í nokkur ár. Um er að ræða 29 manns og koma íslensk stjórnvöld, Akranesbær og Rauði krossinn að verkefninu.