Veður setur strik í reikninginn fyrir Íraleikinn

Kvennalandslið Íslands í knattspyrnu spilar sinn mikilvægasta leik til þessa á fimmtudag þegar það mætir Írum öðru sinni í umspili um laust sæti á EM.

Hætt er við því að veðurguðirnir eigi eftir að setja strik í reikninginn, því eins og er eru engar aðstæður til að spila knattspyrnu á snæviþöktum Laugardalsvelli.

Upp kom sú hugmynd að færa leikinn inn í eina af knattspyrnuhöllunum á höfuðborgarsvæðinu, en það er ekki leyfilegt.

Þórir Hákonarson framkvæmdastjóri KSÍ sagði í samtali við fotbolti.net í morgun að ekki kæmi annað til greina en að spila leikinn á Laugardalsvelli og því yrðu menn að krossleggja fingur yfir því að völlurinn verði leikfær.

Til greina kemur að leikurinn verði færður frá fimmtudegi til föstudags - og jafnvel til laugardags ef veðurskilyrði verða slæm áfram.

Veðurspá fram á fimmtudag gerir ráð fyrir að hitastig verði frá frostmarki og niður í tveggja stiga frost næstu daga, en á föstudag ætti að hlýna eitthvað með úrkomu.