Gunnleifur: Æskilegt að fara í úrvalsdeildina

Ekki er enn komið í ljós hvar landsliðsmarkvörðurinn Gunnleifur Gunnleifsson spilar á næsta tímabili en hann er líklegast á leið frá HK.

„Það er það sama að frétta af mér. Ég er bara enn að skoða mín mál," sagði Gunnleifur sem hefur meðal annars verið orðaður við Val og FH. Hann segist reikna með því að framtíð sín skýrist eftir hálfan mánuð, kannski fyrr.

Gunnleifur hefur unnið sér inn sæti í íslenska landsliðinu og lék virkilega vel gegn Hollandi og Makedóníu. „Það er æskilegt að maður spili í úrvalsdeildinni ef maður ætlar að halda sæti sínu í landsliðinu," sagði Gunnleifur en HK féll sem kunnugt er úr Landsbankadeildinni í sumar.

Samkvæmt heimildum Vísis eru fleiri leikmenn HK á förum frá liðinu. Finnur Ólafsson og Stefán Jóhann Eggertsson eru báðir á óskalista úrvalsdeildarliða og eru að skoða sín mál líkt og Gunnleifur.