Eyjólfur og Hannes skoruðu

Leikið var í sænsku úrvalsdeildinni í kvöld og eins og oft áður voru íslenskir leikmenn í eldlínunni. Eyjólfur Héðinsson og Hannes Þ. Sigurðsson skoruðu fyrir lið sín.

Eyjólfur Héðinsson og Jóhann B. Guðmundsson voru báðir í byrjunarliði GAIS sem vann 2-0 sigur á Gefle. Eyjólfur skoraði fyrra mark GAIS í leiknum. Jóhann var tekinn af velli á 70. mínútu en Eyjólfur á 89. mínútu.

Sundsvall og Trelleborg gerðu 2-2 jafntefli en Sundsvall komst tveimur mörkum yfir í leiknum, Hannes skoraði síðara mark liðsins. Hann lék allan leikinn fyrir Sundsvall eins og Sverrir Garðarsson. Ari Freyr Skúlason var einnig í byrjunarliði liðsins en var tekinn af velli á 65. mínútu.

Malmö vann Norrköping 2-1. Garðar Gunnlaugsson var ónotaður varamaður hjá Norrköping. Þá vann Halmstad 1-0 sigur á Örebro á útivelli.