Scholes verður fyrsta nafnið á skýrslu í úrslitaleiknum

Sir Alex Ferguson sagði Manchester United eiga skilið að vera komið í úrslitaleik Meistaradeildarinnar eftir 1-0 sigurinn á Barcelona í kvöld.

"Þetta er stórkostleg tilfinning. Félagið á skilið að komast í úrslitin með þessa glæstu sögu - og stuðningsmennirnir voru frábærir. Það var gaman að sjá dreng sem er uppalinn hjá félaginu tryggja okkur sigurinn. Hann er sannarlega einn af þeim bestu," sagði Ferguson og bætti við að Scholes yrði vafalítið fyrsta nafnið á leikskýrsluna í úrslitaleiknum.

Hann ítrekaði þátt stuðningsmanna í sigrinum í kvöld. "Þetta var erfitt eftir því sem leið á leikinn því Barcelona þurfti að sækja og taka áhættu. En stuðningsmennirnir hjálpuðu okkur í gegn."