ÍA fallið í 1. deildina - Þróttur og Fjölnir úr hættu

ÍA er fallið í 1. deildina eftir að liðið gerði markalaust jafntefli við KR á heimavelli í kvöld. Þrír aðrir leikir fóru fram í Landsbankadeild karla á sama tíma.

ÍA er með tólf stig og er nú sjö stigum á eftir Fylki, sem er í tíunda sæti, þegar tveir leikir eru eftir.

Fylkir og HK eru þó enn í bullandi fallbaráttu en bæði liðin töpuðu sínum leikjum í kvöld.

Fylkir mátti þola sitt þriðja tap fyrir Fjölni í sumar og í þetta sinn á heimavelli, 3-0. Þetta var fyrsti sigur Fjölnis í deildinni í meira en tvo mánuði.

Þá vann Grindavík enn einn útisigurinn er liðið lagði HK, 2-0, í Kópavoginum.

Fylkir stendur þó betur að vígi þegar tvær umferðir eru eftir og eru með fjögurra stiga forystu á HK.

Fjölnir og Þróttur komu sér formlega úr fallbaráttunni í kvöld. Þróttarar töpuðu þó fyrir Val, 2-0, í kvöld en eru sjö stigum á undan HK í níunda sætinu.

Valsmenn tylltu sér upp í þriðja sæti deildarinnar með sigrinum á Þrótti í kvöld og hafa eins stigs forystu á Fram sem er í fjórða sæti og þá kemur KR í fimmta sæti, tveimur stigum á eftir Val.

Blikar eru með 30 stig, þremur á eftir Val, en eiga leik til góða gegn FH í næstu viku.

Fylgst var náið með gangi leikjanna á Boltavakt Vísis og Fréttablaðsins og má lesa meira um þá með því að smella á viðkomandi leiki.