Borgarstarfsmenn brjálaðir vegna launa Jakobs Frímanns

Tölvupóstar og símhringingar hafa streymt inn á skrifstofu Starfsmannafélags Reykjavíkurborgar vegna frétta af ráðningakjörum Jakobs Frímanns Magnússonar. Jakob er ekki í félaginu og segir Garðar Hilmarsson, formaður starfsmannafélagsins, að félagsmenn komist ekki nálægt þeim kjörum sem Jakob er ráðinn á. Garðar segist þó hafa þann fyrirvara á að hann viti ekki hve mikil vinna liggi að baki launum Jakobs.

Fram hefur komið í fjölmiðlum að Jakob fær 710 þúsund krónur á mánuði. Þar af eru 236 þúsund krónur vegna fastrar yfirvinnu. Að auki er Jakob Frímann með 150 þúsund krónur í nefndarlaun.

Garðar segir að verkefnisstaða hjá Reykjavíkurborg sé vítt hugtak og stöðurnar geti verið mjög fjölbreytilegar eftir því hvaða ábyrgð liggi að baki. Hann segir þó laun Jakobs vera mun hærri en það sem þekkist almennt. Hann tekur dæmi af verkefnisstjóra upplýsingamála sem geti í mesta lagi haft 368 þúsund fyrir 40 stunda vinnuviku, eftir 12 ára starf. Svo sé möguleiki á að verkefnisstjóri hafi um 40-50 stunda yfirvinnu á mánuði sem geti þá þýtt rúm 200 þúsund krónur í viðbót.

„Mér sýnist að hjá okkar félagsmönnum, sem við semjum fyrir, geti hæstu laun farið upp í 500 þúsund með mikilli sérmenntun og sérstökum verkefnum og það eru mjög fá störf," segir Garðar.