Ólafur ætlar að skoða sporslur og greiðslur til borgarfulltrúa - Situr ekki undir spillingarbrigslum

Ólafur F. Magnússon borgarstjóri segir að það sé "ósmekklegt" að segja Jakob Frímann Magnússon fái 860 þúsund krónur á mánuðir fyrir að gegna starfi framkvæmdastjóra miðborgarmála eins og segir í launasamningi hans.

Ólafur segir að í þeirri tölu séu 140 þúsund krónur sem Jakob fái fyrir að gegna nefndarstörfum fyrir Reykjavíkurborg. Jakob er formaður hverfisráðs miðborgar og situr í menningar og ferðamálanefnd borgarinnar.

Ólafur segir að allar líkur séu á því að Jakob muni ekki gegna þeim störfum áfram taki hann að sér hina nýu framkvæmdastjórastöðu.

"Ef það leikur minnsti vafi á að nefndarstörfin séu ósamrýmanlegt störfum hans hjá borginni þá dettur hvorki honum né mér í hug að haldið verði áfram þar," segir Ólafur.

Vísir ræddi við Jakob Frímann Magnússon í kjölfarið og sagði hann að enginn ákvörðun hefði verið tekin um hvort hann myndi gegna nefndarstörfum meðfram nýja starfinu.

Borgarstjóra þykir sárt að vera bendlaður við það að hygla mönnum aða að fara illa með almannafé.

"Sérstaklega þar sem ég hef aldrei á mínum 16 árum sem borgarfulltrúi ferðast eða þegið dagpeninga frá borginni," segir Ólafur og bætir við að sumir þeirra borgarfulltrúa sem hæst láti núna ættu að "skoða sjálfan sig".

"Mér finnst að borgarfulltrúar ættu að vera meira við. Þeir eru að mínu mati allt of mikið í útlöndum," segir hann.

Hann segist jafnframt ætla, í tilefni af þeirri umræðu sem nú eru uppi, að skoða allt umhverfi borgarfulltrúa, sporslur ferðir, dagpeninga og annað slíkt.

"Vegna þess að það er verið að draga upp þá mynd af borgarstjóranum að hann sé á einhvern hátt spilltur eða fari illa með almannafé. Það er eitthvað sem ég ætla ekki að sitja undir."

Ítarlegt viðtal er við Ólaf F. Magnússon í Íslandi í dag í kvöld.