Umdeilt fagn hjá leikmanni Ipswich

David Norris, miðjumaður Ipswich Town, hefur verið gagnrýndur harðlega fyrir það hvernig hann fagnaði marki sínu um helgina. Hann lét sem hann væri í handjárnum en með því ætlaði hann að sýna fyrrum liðsfélaga sínum, Luke McCormick, stuðning.

McCormick var í síðasta mánuði dæmdur í sjö ára fangelsi fyrir að valda dauða bræðrana Aarons og Ben Peak en þeir voru 10 og 8 ára. McCormick var að keyra heim til Plymouth eftir að hafa verið gestur í brúðkaupi Norris og keyrði á aðra bifreið á leiðinni.

Í bílslysinu létust þeir Aaron og Ben. McCormick mældist með óhóflega mikið magn af áfengi í blóðinu en auk þess var bifreið hans ótryggð. Á þessum tíma var hann leikmaður Plymouth.

Amanda, móðir drengjana sem létust, er allt annað en sátt við skilaboðin frá Norris. „Svona gerir maður ekki. Ef þú ætlar að sýna honum stuðning þá er hægt að heimsækja hann í fangelsið, skrifa til hans bréf eða hringja í hann. Svona gerir maður ekki," sagði Amanda reið.

Enska knattspyrnusambandið hefur skrifað bréf til Ipswich og beðið um útskýringu frá David Norris. Á heimasíðu Ipswich er sagt að Norris verði sektaður af félaginu en hann harmi það að fólk hafi misskilið skilaboð sín.