Kristinn stóðst prófið í Sviss

Kristinn Jakobsson stóðst öll þau próf sem lögð voru fyrir hann í æfingabúðum dómaranna sem koma til með að starfa við Evrópumeistaramótið í Austurríki og Sviss í sumar.

Um var að ræða æfingabúðir fyrir dómarana þar sem ýmis þolpróf voru lögð fyrir þá. Þurftu þeir að standast prófin til að fá að starfa á EM í sumar.

„Þetta gekk allt ljómandi vel. Ég náði meira að segja að slá persónulegt met," sagði Kristinn í samtali við Vísi en hann heldur aftur heim í dag.

Það voru þó ekki allir sem stóðust lágmarkskröfurnar. Þrír aðstoðardómarar, frá Hollandi, Spáni og Noregi, þóttu ekki í nægilega góðu formi og voru því sendir heim.

„Það verður þó ekki skipt um nein dómarateymi. Ef aðaldómarinn sjálfur hefði fallið á prófinu eða þá tveir af þremur aðstoðardómurum hefði þurft að skipta um viðkomandi teymi. Það kom ekki til þess nú," sagði Kristinn.

Þá var einnig farið yfir fyrirmæli og áherslur dómaranefndar keppninnar og fjölmiðlar fengu einnig aðgengi að dómurunum. Þeir fengu afhent opinbert dómaraúr keppninnar.

Kristinn mun starfa á þremur leikjum í keppninni en allir þeir átta dómarar sem gegna hlutverki fjórða dómara á leikjum í riðlakeppninni fara heim að henni lokinni.

„Það eru 24 leikir í riðlakeppninni og við erum átta. Við fáum því þrjá leiki hver. Eftir það munu þeir dómarar sem eftir verða í keppninni skipta með sér hlutverkum."

Kristinn er engu að síður ánægður með að fá að taka þátt í verkefninu. „Þetta er eins og draumur."