Ástralíutúr Galaxy frestað vegna Beckham

Bandaríska knattspyrnufélagið LA Galaxy hefur ákveðið að fresta æfingaleik sem fyrirhugaður var í Ástralíu þann 11. desember gegn Queensland Roar.

Ástæðan er fyrirhuguð för David Beckham sem lánsmaður til ítalska liðsins AC Milan í janúar, en ekki þykir rétt að taka áhættu með að hann meiðist fyrir Ítalíuförina.

"Við vildum ekki bregðast áhorfendum og því var ákveðið að seinka leiknum," sagði talsmaður Galaxy.

Galaxy mun engu að síður spila æfingaleik við sérstakt úrvalslið á Nýja-Sjálandi þann 6. desember.